ILOILO CITY – Duha ka mga anggulo ang ginasundan sang mga otoridad sa pagluthang-patay sa empleyado sang Department of Agrarian Reform (DAR) sa Tagbak Jaro Iloilo City.
Ang biktima amo si Alan Salario, ginabanta naga edad sang masobra 50 anyos, residente sang Calmay, Janiuay Iloilo kag Engineering Aid kag driver sang DAR. Region 6.
Sa exclusive interview sang Bombo Radyo Iloilo kay Police Captain Eduardo Siacon Jr, hepe sang Jaro Police Station, iya ginpahayag nga may kaangtanan sa trabaho kag personal nga kaakig ang posible rason sa pagpatay sa biktima.
Suno kay Siacon, sa ila pagpangusisa sa abyan ni Salario, antes mapatay ang biktima, daw kaangay nga nagapamilinbilin ini.
Ginbuksan naman sang mga otoridad ang cellphone sang biktima, apang wala sila sang may makita nga mga mensahe nga naga angot sa krimen.
Lantawon naman nila ang kuha sang closed circuit television (CCTV) sa lugar agud matumod ang suspek sa pagpatay sa biktima.
