ILOILO CITY – Ginpasiguro sang Commission on Elections (Comelec) nga indi apektado ang trabaho sang ahensiya sa pihak sang iskandalo nga ginapangatubang ni Chairman Andres Bautista.
Kasunod ini sang mga akusasyon sang misis ni Bautista nga si Patricia Paz nga may ill-gotten wealth ang poll body chief nga nagalab-ot sa P1 billion.
Sa interview sang Bombo Radyo Iloilo, ginpahayag ni Comelec spokesman James Jimenez nga padayon ang ila trabaho sa pihak sang isyu batok sa ila pinuno.
Suno kay Jimenez, wala siya sang makita nga rason nga makaapekto ang operasyon sang Comelec ang personal nga problema sang nagapamuno sa ahensiya.
Dugang pa sang Comelec spokesman, antes pa man nabulabog ang kontrobersiya batok kay Chairman Bautista, padayon ang trabaho sang Comelec ilabi na sa pagpanghanda sa barangay election.