Nagpaguwa si Mayor Raisa Treñas sang executive order nga naga-suspinde sang trabaho sa tanan nga opisina sang city government kag klase sa tanan nga lebel sa syudad sang Iloilo buwas, Hulyo 25.
Ini nga direktiba ginpatuman kasunod sang rekomendasyon sang Iloilo City Emergency Operations Center (OpCen) kaangot sa epekto sang mabaskog nga ulan dala sang Habagat kag Typhoon Emong.
“Magapadayon naman ang operasyon sang mga ahensya nga responsable sa basic, vital, kag essential services para sa publiko,” suno sa City Government sa social media post subong nga gab-i.
Pahayag sang alcalde, naga-susprer sa gihapon sang baha ang 37 ka mga barangay samtang 30 ka mga evacuation center ang bukas para sa operasyon kun sa diin involved man ang city employees.
Dugang ni Treñas, gin-isyu sini ang direktiba bangud indi mahimo makompromiso ang safety kag ikaayo sang mga residente ilabi na sa mga areas kun sa diin malala gid nga pagbaha ang natabo tuga sang Habagat kag bagyo.
“We cannot compromise the safety and wellbeing of our residents, particularly those severely affected by the flooding. This proactive measure is intended to provide temporary relief and ensure that government responders and volunteers can continue to focus on immediate recovery and assistance efforts,” dugang sini. “Padayon lang kita sa pagbinuligay. Maghalong kita pirmi kag magbantay sa mga anunsyo sang gobyerno.”#
