ILOILO – Ginabanta 50 ang close contacts sang isa ka job hire sang General Services Office sang Iloilo Provincial Capitol nga nagpositibo sa Coronavirus Disease 2019 (COVID-19).
Sa interview sang Bombo Radyo kay Provincial Administrator Atty. Suzette Mamon, iya ginpahayag nga 9 ang nalakip sa high risk, 8 sa medium risk kag 32 ang low risk.
Suno kay Mamon, ang mga naka-angkon sang close contacts ang napaidalom na sa COVID-19 test apang ang mga nalakip sa high risk ang naka-facility quarantine samtang ang mga yara sa medium kag low risk ang naka-home quarantine.
Ginpahayag ni Mamon nga ang disinfection ang tapuson sa labing madali nga tion agud nga mabuksan na sa liwat ang kapitolyo.
Samtang naka-lockdown ang kapitolyo umpisa sang Agosto 2, ang iban nga empleyado ang naka work-from-home agud nga mapadayon ang trabaho.
Buwas nga adlaw, Agosto 5, magabalik na ang trabaho sa kapitolyo.
