Ka-Bombo, ano ang mas naluyagan mo sa pandesal? Ang medyo ma-alat alat, ukon ang matam-is?
Sa tunga sang nagasaka nga presyo sa kalamay sa Pilipinas, may grupo sang community bakers nga nagaduso nga ibalik ang traditional “salty” pandesal ukon ang medyo ma-alat alat nga sahi sang pandesal.
Suno kay Asosayon ng Panaderong Pilipino president Lucito Chavez, madamo na sang magagmay nga bakeries sa pungsod ang napilitan nga magsirado bangud sa padayon nga pagsaka sang presyo sang ingredients sa paghimo sini.
Bangud sini, ginakonsiderar sang grupo nga i-reformulate ang pandesal recipe agud mahimo ini nga maasin-asin.
Sa pagkamatuod, ang pandesal nagakahulugan sang “salt bread” apang diri sa Pilipinas, masami nga matam-is ang sabor sini.
Kaangot diri, nagapanawagan si Chavez sa iban pa nga mga panadero nga tun-an liwat ang traditional nga recipe kag ipatilaw sa mga kabataan ang sabor.
Ginpanugyan man sini nga i-include ang healthy additives sa bread products kaangay sang kalabasa, kamote, carrots, kag balunggay.
Sa bahin naman sang Department of Agriculture ginasuportahan sini ang nasambit nga ideya kag nagpahayag man nga may mga tikang na nga ginahimo agud nga ma-address ang nagasaka nga presyo sang ingredients.
Kun matandaan, ang Department of Agriculture kaupod ang Department of Trade and Industry, Department of Science and Technology kag ang private sector ang naglunsar anay sang “coco pandesal” — ang version sang bread roll nga human sa coconut flour.
Ang pagdevelop sang flour variant ang isa ka tikang agud nga mabuligan ang community bakers bangud mas barato ini ipaanggid sa naandan nga flour kag madamo pa sang benepisyo sa ikaayong lawas. ##
