ILOILO CITY- Patay ang isa ka job hire sang Iloilo City Hall matapos ginbuno sang traffic auxilliary sa fiesta sa Barangay Gloria, Iloilo City Proper.
Ginkilala ang biktima nga si Manuel Pasinag, 56, kag naga trabaho sa Task Force Anti-Squatting and Illegal Structures (ASIS) samtang ang suspek naman amo si Melchor Alivas, 44 anyos kag naga trabaho sa idalom sang Public Safety and Transportation Management Office (PSTMO) kag lunsay residente sang nasambit nga lugar.
Suno kay Police Staff Sergeant Alberto Espinosa, imbestigador sang Iloilo City Police Station 1, updanay sa ilimnan ang duha sang hinali lang nga nagmaoy ang suspek sa diin may ginsaway ini nga mal-am.
Ginapahayag nga ginsita sang iya kaupdanan si Alivas nga posible kabangdanan sang iya pagpangakig.
Suno kay Espinosa,nagpauli ang suspek kag sang nagbalik ini, may ginauyatan na ini nga kutsilyo.
Gintuyo punggan ni Pasinag si Alivas apang hinali lang siya nga ginbuno sang suspek sang makapila ka beses sa dughan, guya kag kamot nga gintunaan sang iya kamatayon.
Madasig naman nga nagpalagyo ang suspek matapos ang ginhimo nga krimen.
Samtang, ginpangunahan naman ni PSTMO Head Mr. Jeck Conlu, ang pagpa sungka sa suspek.
Suno kay Conlu, katuyuan sang pagsungka ni Alivas amo nga mahatagan sang hustisya ang natabo kag maplastar man sang suspek ang iya bahin.
