ILOILO CITY – Na eksperyensyahan ang traffic congestion kadungan sa pag-umpisa sang Modified General Community Quarantine sa syudad sang Iloilo.
Santo sa assessment ni Public Safety and Transportation Management Office head Jeck Conlu, nagpugok ang trapiko kaina sang hapon, Hunyo 1, ilabi na sa mga lugar nga may yara sang on-going road construction.
Suno kay Conlu, apisar nga tuman ka gamay ang nagabyahe nga depampasahero nga salakyan, may yara sang traffic ocngestion bangud nga madamo ang nagapadulong sa syudad sang Iloilo sakay sa private car kag kalabanan ang may yara sang transaksyon sa government agencies.
Ginpahayag ni Conlu nga ginalauman na nga daan nga magadamo ang magapadulong sa syudad sang Iloilo matapos ang pila ka bulan nga pagpatuman sang lockdown.
Sa tion nga magdamu na ang public transport, ginpahayag sang natungdan nga magagamay na lang ang pribado nga salakyan kag may kaangtanan diri, amat-amaton na sa pagbukas ang dalan sa palibot sang Iloilo Terminal Market.
Subong nga semana, ginalauman nga matapos na sa pag-imprinta ang citation ticket nga amo naman ang igahatag sang compliance officers sa madakpan nga violators ilabi na kun minimum health protocols ang pagahambalan.
