Gina-imbestigaran sa subong sang Iloilo City Traffic and Transportation Management Office (ICTTMO) ang isa ka traffic enforcer nga nakuhaan sang litrato nga nagagamit sang iya cellphone samtang nagamaneho sang motorsiklo sa City Proper.
Sa interview sang Bombo Radyo kay ICTTMO Head Retired Colonel Uldarico Garbanzos, iya ginpahayag nga nag-agi na sa investigation section ang nasambit nga traffic enforcer sang nagligad nga semana kag yara na sa proseso ang administrative inquiry batok sa iya.
Suno sa iya, ginpatawag na man ang enforcer agud magpaathag kung ano gid ang natabo, samtang ginahulat pa ang final investigation report nga magapamatuod sang kumpleto nga detalye sang insidente.
Pahayag pa ni Garbanzos, kun mapamatud-an nga may lapses ukon paglapas sa iya nga katungdanan ang enforcer, ipatuman ang nagakaigo nga administrative sanction suno sa Code of Ethics and Ethical Standards, existing policies, kag executive orders.
Ginpahayag pa niya, samtang nagapadayon ang imbestigasyon, nagapadayon man sa pag-duty ang nasambit nga enforcer.
Ginpahanumdoman man ni Garbanzos ang tanan nga traffic enforcers nga dapat mangin modelo sa dalan kag magpakita sang maayo nga pagpatuman sang ila katungdanan, bangud delikado ang paggamit sang cellphone samtang nagamaneho kag mahimo ini magresulta sa aksidente.
Dugang pa niya, may mga supervisor nga naga-monitor sa mga personnel sa ila tagsa ka designated area, lakip na ang pag-require sang hourly situational report (SITREP) agud masubaybayan ang sitwasyon sang trapiko kag ang ila mga aktibidad sa dalan.
