Iloilo – Ginaduso sang Public Saftey and Transportation Management Office nga pasanyugon ang traffic management skills sang mga traffic aides sa Iloilo City.
Ini agud mas mangin epektibo ang pagdumala sang trapiko sa syudad kaangay sa pagbuhin sang left turns kah U-turns sa mga ruta.
Sa interview sang Bombo Radyo kay Mr. Jeck Conlu, pinuno sang amo nga talatapan, iya ginpahayag nga pinaagi sa paggamit sang makabag-o nga teknolohiya, mas mapadasig ang pagbuhin sang pagpugok sang trapiko
Ini ang pinaagi sa intelligent traffic management system nga isa ka smart traffic management nga nagagamit sang digital technologies agud magdumala sang trapiko.
Suno kay Conlu, antes pa man ipahamtang ang intelligent traffic management system, maga-install anay sang closed-circuit television kag radio communication agud mas mahapos nga masolusyunan ang trapiko.
Sa subong, ginalauman nga magapadayon ang mga trainings sang Public Safety and Transportation Management Office agud mapasangkad ang ihibalo sa pagdumala sang trapiko sa Iloilo City.
Samtang, nagahingyo naman ang natungdan sang kooperasyon sang mga motorista nga magsunod sa layi apisar nga wala sang nagabantay nga mga traffic aide
