ILOILO CITY – Lauman nga mangin mas istrikto pa ang implementasyon sang traffic rules and regulations sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga kaina, nagpatigayon siya sang pagsinapol kaupod ang Land Transportation Office (LTO), Highway Patrol Group (HPG), Philippine National Police (PNP), kag Public Safety and Transportation Management Office (PSTMO).
Suno kay Treñas, naghingyo siya sang bulig sa HPG sa pag-train sang mga personnel nga amo ang magasakay sa mga motorsiklo nga ginhatag sang Iloilo City Government sa PNP kag PSTMO.
Nagapangita na sila sang schedule suno kay Treñas kag ini ang bug-usan sang pito ka adlaw lakip na ang training nga igahatag sang LTO.
Kun mahimo suno kay Treñas, mapalagas subong nga tuig ang amo nga training.
Kabahin man sang naistoryahan suno sa alkalde amo ang pagbulig sang apat ka opisina sang pagbantay kag pagmonitor sang mga salakyan sa Senator Benigno Aquino Jr. Avenue, Mandurriao.
Ginabanta yara sa 14 kms ang sakop sang jurisdiction sang syudad sa amo nga lugar lakip na ang service road.
Suno sa alkalde, sa kada kilometro, may yara sang i-assign nga manager halin sa apat ka grupo nga amo ang magapanguna sa monitoring kag mapat-od nga nagasunod ang mga drivers sa pagsulundan sa trapiko.
Iga-implementar naman suno sa natungdan ang street of discipline sa nasambit nga lugar, kag ginalantaw nag magasunod amo ang McArthur Drive, Tabuc Suba, Jaro.
Nahibaluan nga sa idalom sang street of discipline, may plano nga butangan ang amo nga mga dalanon sang waiting shed kag traffic lights para sa mga pedestrians.
Plano man sang alkalde nga pahamtangan sang high-definition closed circuit television (CCTVs) ang mga dalanon.
Gin-athag man sang alkalde nga ini ang inisyatibo sang Iloilo City Government agud indi mangin kaangay sang iban nga syudad nga tuman ka gutok ang mga salakyan kag mabudlay ang kontrol sa trapiko.
