Limitado gihapon sa online training ang paghanas sang pila ka Filipino athletes nga amo ang magatiglawas sang pungsod sa Southeast Asian Games.
Ginatinguhaan pa sang Philippine Sports Commission nga makakuha sang clearance gikan sa Inter-Agency Task Force (IATF) agud nga mapahanugutan na ang mga atleta nga mag-face to face training.
Una diri, nahatagan na sang go-signal ang mga miyembro sang national karate, taekwondo, kag boxing teams nga maka-train sa Inspire Sports Academy sa Calamba Laguna.
Magluwas diri, ang iban nga mga atleta sang pungsod nga magapasakop sa Tokyo Olympics ang naga-train na sa luwas sang pungsod.
Lakip diri ang gymnast nga si Caloy Yulo, pole vaulter nga si EJ Obiena, kag boxer nga si Eumir Marcial.
Suno naman kay national training director Marc Velasco, nagahulat man sila nga mapatigayon na ang pagbakuna agud nga mahalugan na ang mga pagsulundan sa mga atleta.
Nahibaluan nga bangud sa COVID-19 pandemic, lunsay lang virtual sessions ukon online ang training sang mga Filipino athletes sang 2020.
