ILOILO CITY – Nagpaathag ang Civil Service Commission Region VI may kaangtanan sa pag-reinstate sa ginareklamo nga principal nga si Mrs. Venus Divinia Nietes sa Laua-an National High School.
Sa interview sang Bombo Radyo kay Nelson Sarmiento, director sang Civil Service Commission Region VI, iya ginpahayag nga 2022 sang nag-apelar si Nietes sa ila talatapan sang gin-assign ini sa division office sang Antique.
Suno kay Sarmiento, sang gin-aktuhan ang kaso, nakita nga wala nagsunod sa rules ang pag-transfer kay Nietes.
Partikular nga gintumod ni Sarmiento nga basehan amo nga wala sang nakabutang nga definite function si Nietes sa officer order.
Pahayag ni Sarmiento, base sa rules, ginaswelduhan ang mga empleyado sang gobyerno agud nga magserbe.
Bangud sini, liwat nga ginbalik si Nietes sa Laua-an National High School sa iya daan nga posisyon.
Dugang pa ni Sarmiento, sa sulod sang isa ka tuig, indi mahimo nga ma-reassign ang isa ka empleyado sa tion nga madeklarar sang Civil Service Commission nga invalid ang transfer order.
Sa subong, wala sang kaso si Nietes sa Civil Service Commission Region VI.
