ILOILO CITY- Wala sang nakit-an nga mga lagob kag wala man sang ‘signs of struggle’ sa lawas sang transgender nga nasapwan nga patay sa ginadayunan sini nga appartel sa Station 3, Barangay Manocmanoc sa Boracay, Malay, Aklan.
Sa interview sang Bombo Radyo kay PLt Col Don Dicksie De Dios, hepe sang Malay Municipal Police Station, iya ginpahayag nga ini ang naggwa nga resulta sa ginpatigayon nga physical examination sa biktima.
Ang biktima nagbakasyon lamang sa Boracay apang tumandok gid sang Barangay Manggahan, Camarin, Caloocan City.
Ang mga kaupdanan sini mismo ang nakasapu sa biktima nga wala na sang kabuhi sa sulod sang iya nga hulot.
Suno kay De Dios, naggwa man sa ila imbestigasyon nga posible heart attack ang natabo bangud santo sa panaysayon sang iya kaupdanan, nagasakit na ang dughan sini kag nabudlayan nga magginhawa antes pa man sila nag-abot sa Boracay sang Enero 3, isa ka adlaw antes siya napatay.
Samtang, nagpositibo man sa COVID-19 ang bangkay sang transgender nga gindala na sa funeraria sa Iloilo City agud i-cremate.
Dugang sang natungdan, kun may yara man sang hingyo ang pamilya sang biktima, ang Crime Laboratory na lang ang magadesisyon tuhoy diri.
