ILOILO CITY- Ginkwestiyon sang isa ka consumer group ang transparency sang Panay Electric Company may kaangtanan sa liwat nga pag-file sang franchise application sang nasambit nga electric company bilang sole power distributor sa Syudad sang Iloilo.
Ini kasunod sang pagfile ni Abang Lingkod party-list Rep. Joseph Stephen Paduano sang Agusto 22 sang hagna nga nagatuyo nga i- renew ang congressional franchise sang Panay Electric Company agud mag- distribute sang kuryente sa Iloilo City.
Sa interview sang Bombo Radyo Iloilo kay Mr. Ted Ong sang Freedom From Debt Coalition, iya ginpahayag nga palipot ang ginhimo sang Panay Electric Company bangud wala sini ma-inform ang Committee on Public Utility sa Iloilo City Council tuhoy sa pagfile sang ila renewal sang franchise.
Ginpahayag man ni Ong nga kwestiyonable man ang pagsponsor ni Abang Lingkod party-list Rep. Paduano sang hagna nga nagaduso sang renewal sang franchise sang Panay Electric Company nga yara man si Iloilo City Lone district Congresswoman Jam-jam Baronda nga mahimo mag-sponsor sang hagna.
May kaangtanan naman sa patigayunon nga hearing sa Committee on Legislative Franchise sa kongreso sa palaabuton nga Mierkules, Setyembre 11, ginpahayag ni Ong nga wala sang pat-ud ang pagtambong sang ila grupo bangud wala sila sang imbitasyon.
Apang ginpasiguro naman niya nga ila ipalab-ot sa nasambit nga kumitiba ang mga isyu may kaangtanan sa Panay Electric Company nga wala pa maresolba kaangay sang refund nga nagalab-ot sa P631 million bangud sa pag overcharge sa mga konsumidor kag iban pa.
