Nagpamatok gid ang transport cooperatives kag taxi operators sa Iloilo City sa pagpasulod sang mga blue taxis sa syudad.
Ini matapos gin-grant sang Land Transportation Franchising and Regulatory Board (LTFRB) ang operasyon sang kapin 100 units sang taxi sang duwa ka Davao-based companies.
Suno sa mga asosasyon sang mga taxi operators, ginkibot lang sila sa desisyon kag wala sila ginkonsulta antes gin-aprobahan ang aplikasyon sang blue taxis.
Sa interview sang Bombo Radyo kay Raymundo Parcon, Chairman sang Western Visayas Transport Cooperative (WVTC), iya ginpahayag nga nagasolobra na ang mga existing taxis sa syudad.
Suno sa iya, yara man ang presensya sang mga Grab units gani indi na kinahanglan ang blue taxis.
Dugang niya, mas mangin mabudlay para sa mga kasubong nila nga traditional taxi operators nga makigkompetensya.
Suno naman kay Rizal Alido sang Iloilo City Alliance of Operators and Drivers Transport Cooperative, pat-ud ngab mabuhinan gid ang ila kita.
Kun matabo ini, mabudlayan sila sa pagbayad sang ila loan sa bangko sa pagbakal sang mga modern jeepneys.
Para sa ila, dapat unahon anay ang mga lokal nga operators nga dugay na nagasakripisyo kag nagaserbisyo sa mga pasahero sa syudad.
