Nagsulat na ang pamunuan sang Iloilo City Alliance Operators and Drivers Transport Cooperative (ICAODTC) sa Iloilo Provincial Government kag Iloilo City Government agud mabuligan ang mga driver sa idalom sang service contracting program sang Land Transportation Franchising and Regulatory Board (LTFRB) nga natapos na sang Hunyo 30 apang wala sa gihapon na-release ang sweldo sang mga driver sang modernized jeepneys.
Sa interview sang Bombo Radyo kay Rizalito Alido, Board Secretary sang Iloilo City Alliance Operators and Drivers Transport Cooperative (ICAODTC), iya ginpahayag nga nagalaom sila nga sa tion nga makapasar sang resolution ang duha ka lokal nga gobyerno, basi pa lang mapadasig ang pagproseso sang sweldo sang mga driver.
Suno kay Alido, una na nagpasalig ang LTFRB Region VI, nga ginaproseso na subong sa Department of Budget and Management ang pondo para sa sweldo sang mga driver kag sa tion nga mahusay, igapanagtag gilayon.
Dugang pa niya, wala sila nagakadulaan sang paglaom nga mahatag sang ahensya ang ginpasalig nga sweldo nga ginpangabudlayan man sang Libre Sakay drivers.
Samtang, ginpasalig sang chairman sang Committee on Transportation sa konseho nga i-endorso sa central office sang LTFRB ang isyu natuhoy sa wala gihapon nakaabot nga sweldo sang drivers sa idalom sang service contracting program.
Sa interview sang Bombo Radyo kay Iloilo City Councilor Atty. Rommel Duron, iya ginpahayag nga magluwas sa LTFRB, makig-angot man ang iya komitiba sa Department of Budget and Management agud nga ma-monitor ang status sang sweldo kag kun san-o posible ma-release sa mga Libre Sakay drivers.
Sa pihak sini, nagapati si Duron nga kuntani sang una pa lang nga wala na naka-release sang sweldo ang LTFRB, gin-untat na lang kuntani ang service contracting program.
