Magapatigayon sang transport strike ukon ”Untat Byahe kag Untat Tughong” ang mga katapo sang nagkalain-lain nga transport cooperative sa Panay sa Abril 21, halin alas-6 sang aga tubtob alas-6 sang gab-i.
Ini bilang pagpamatok sa padayon nga pagtaas sang presyo sang gatong nga ginapangatubang sang pungsod.
Sa interview sang Bombo Radyo kay Elmer Forro, secretary general sang Bayan Panay, iya ginpahayag nga madamo na sang mga transport groups ang nagpabutyag sang ila intensyon nga mag-upod sa strike.
Suno sa iya, apisar wala pa man nagsugod ang pormal nga untat byahe, madamo na sa mga miyembro sang transport sector ang nagdesisyon nga mag-untat pasada bangud sa mabug-at nga epekto sang mahal nga gatong.
Dugang pa niya, may mga kabanwahanan man nga nagpahayag sang suporta nga mag-upod sa nasambit nga strike.
Ang mga transport groups ang naga-isa sa ila panawagan agud mapabati ang ila kahimtangan sa subong nga mabudlay ang sitwasyon.
Nagpanawagan man ang grupo sa mga private transport operators nga mag-upod man sa strike bangud mangin dako nga pag-ugyon ini kon madamo ang magbuligay kag maghiusa.
