Nalipay kag makaguluginhawa sang gamay ang pila ka mga transport cooperative sa Western Visayas bangod sa ginapaabot nga rollback sang presyo sang petrolyo sa masunod nga semana.
Sa interview sang Bombo Radyo kay Raymundo “Boyet” Parcon, chairman sang Western Visayas Transport Cooperative, iya ginpahayag nga dako ini nga bulig kag epekto sa ila operasyon kag pangabuhian.
Gindugang pa niya nga ginapaabot man nga may mga drivers nga magabalik sa pagbiyahe bangod sa ginapaabot nga pagnubo sang presyo sang krudo.
Nalipay man sila nga ipatuman ang rollback sa Martes kag nagalaom pa gid sang dugang nga rollback sa masunod nga semana bangod sa sitwasyon sa Strait of Hormuz.
Suno kay Parcon, ini nga development makahatag sang paglaum sa sektor sang transportasyon nga nag-antus sang mataas nga gasto sa nagligad nga mga semana.
Nagalaum ang mga transport cooperative nga magapadayon ang positibo nga trend sa presyo sang petrolyo agud mas mapabaskog ang ila sektor kag serbisyo sa publiko.
