Indi pabor ang pila ka mga transport groups nga palawigon pa ang Modified Enhanced Community Quarantine (MECQ) status sa syudad sang Iloilo.
Ini ang kasunod sang nangin pahayag ni Iloilo City Mayor Jerry Trenas nga dako ang posibilidad nga MECQ ang mangin status sa gihapon sang syudad sa bulan sang Hulyo bangud sa mataas nga kaso sang COVID-19 sa Iloilo City.
Sa interview sang Bombo Radyo kay Mr. Raymundo “Boyet” Parcon, Presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga mas mamigado na gid ang mga jeepney drivers bangud magamay lang nga mga pasahero ang mahimo nila nga maakomodar kasunod sang pagsirado sang pipila ka mga negosyo nga wala ginapahanugutan nga magbukas sa idalom sang MECQ guidelines.
Suno kay Parcon, humalin sang nag umpisa ang pagpaidalom sang syudad sa mas istriko nga community quarantine status, wala gid sila sa transportation sector sang may nabaton nga ayuda.
Sa pagkamatuod pahayag niya, may mga unit na sila nga ginpa-untat na bangud sa kapigado sang kita.
Dugang pa sang natungdan, magluwas sa mga drivers, apektado man ang mga operators bangud wala na sila sang may ginakuha nga arkila nagikan sa mga jeepney drivers bangud kun kaisa, yara lang sa P150 tutob P200 ang matipon nga kita sang mga drivers sa ila nga pagbyahe.
