Gin-umpisahan na sang transport cooperative sa Western Visayas ang 50% lang nga pagpabyahe sang ila nga mga unit bangud sang epekto sang pagtimbuok sang presyo sang gatong.
Sa interview sang Bombo Radyo kay Mr. Raymundo “Boyet” Parcon, chairman sang Western Visayas Transport Cooperative, iya ginpahayag nga kun indi pa gid mag-ayo ang sitwasyon, mapilitan sila nga 30% na lamang sa mga unit ang maga-byahe sa mga karsada sa masunod nga semana.
Suno kay Parcon, kun wala pa gid sang ayuda nga mabaton, posible nga maabot gid sa punto nga tag-lima na lamang ka unit halin sa ila kooperatiba ang magabyahe sa kada ruta.
“Kun mag-sige-sige pa gid ini kag wala pa gid sang ayuda ang aton gobyerno, may tendency ini nga kada ruta namon, lima ka unit na lang ang ipa-byahe,” suno kay Parcon.
Magasapol man ang alyansa kaangot sa posible nga transport holiday kag kun ano ang ila himuon kun wala gihapon sang tupa ang mga promisa sang gobyerno kaangot sa subsidiya sa tunga sang nagapanglakaak nga presyo sang langis.
Pahayag pa ni Parcon, wala pa sila sang may nabaton nga ayuda halin sa Department of Transportation (DOTr). Naga-reklamo ini bangud nagalain-lain ang mga requirements kaangay sang G-Cash account nga ginapangayo naman sa mga driver nga indi man nila mahatag bangud wala man sila sang account.
“Ang kinahanglan tani namon immediate action gid bala,” suno kay Parcon. “Ang iban gani naton nga mga driver nagabitbit na sang martilyo kag lagari. Gasiling sila nga may kay-uhon nga balay kag mauntat anay byahe kay may P700 pa sila nga kita kag wala pa buhin.”
Una na nga ginpahayag sang grupo nga nagalab-ot sa P100,000 ang ila mapierde sa kada adlaw bangud sa problema sa gatong.
Ginakibang sila suno kay Parcon bangud may loan pa sila sa bangko kag tuman ka kulang ang ila kita agud nga maswelduhan ang ila mga driver kag konduktor.
Nahibaluan nga may 95 units sang modernized jeepneys ang WVTC nga naga-operate diri sa syudad.
“Amo na gani nga kun ang subsidya sang gobyerno nagtupa, bisan gamay lang tani na, makabulig gid tani,” pahayag pa ni Parcon.
Una na nga gin-anunsyo sang DOTr nga may fare increase nga ipatuman kuntani sang Huwebes kun sa diin piso ang isaka sa traditional jeep samtang dos pesos naman sa modernized units, apang ginbawi ini ni President Bongbong Marcos.
“Nadulaan na kami sang pag-asa kag salig sa gobyerno bangud sang nagakatabo subong. Kay daw wala gid sang fixed nga ginahambal ang gobyerno sa ginahambal nila. Daw duso-butong, ginpasaka niyo sa kapayas kag gintapas, te karon, kami ang kaluluoy diri sa dalom,” dugang ni Parcon.#
