ILOILO CITY- Ginsukmaan sang pinuno sang transport group sa Syudad sang Iloilo ang gobyerno tuhoy sa wala gihapon nagtupa nga subsidy para sa mga apektado sang PUV modernization program.
Sa interview sang Bombo Radyo kay Mr. Boyet Parcon sang Iloilo City Loop Alliance of Jeepney Owners and Drivers Association, iya ginpahayag nga madugay na nga pasalig sa ila sang Department of Transportation kag Technical Education and Skills Development Authority apang wala gid sang may natuman nga assistance.
Matandaan nga nagpirma ang Department of Transportation kag Technical Education and Skills Development Authority sang Memorandum of Agreement (MOA) on Stakeholder Support Mechanism Component sa idalom sang Public Utility Vehicle Modernization Program (PUVMP).
Sa idalom sang MOA, may budgetary appropriation nga P 350-million para gamiton sa skills training kag skills assessment kag scholarship sa mga kabataan sang mga drivers kag pamilya sang apektado nga miembro sang sektor sang transportasyon.
Samtang, gin-akusahan naman ni Parcon si Department of Transportation Undersecretary Mark De Leon nga sa baylo nga magbulig, ginapahog pa sila ni De Leon nga kun indi sila maka-comply sa mga requirements sa PUV modernization, ihatag ang prangkisa sa mga pribado kag makasarang nga mga operators.
Bangud sini, nabalaka si Parcon nga madamo nga mga individual operators ang madulaan sang palangabuhian bangud wala sang ikasarang nga mag-bakal sang modernized jeepney.
Gin-athag naman ni Parcon nga wala sila nagapamalabag sa modernization program kun husto kag nagatupa lang ang subsidy nga ginapangako sa ila sang gobyerno.
