ILOILO CITY- Indi na magbaton ang mga transport group sa Iloilo City sang mga luyag magsulod sa ila kooperatiba agud makabyahe sang modernized jeepneys.
Ini ang kasunod man sang pormal nga pagpatuman sang modernization sang mga public utility vehicle (PUV).
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga natapos na ang membership kag consolidation sa Land Transportation Franchising and Regulatory Board (LTFRB) sang Marso 24.
Suno kay Parcon, ang validity sang tanan nga mga individual franchisee ang nagtakop na sang Abril 30.
Apang, sa subong, gina-amat-amat pa lang dula ang mga traditional jeepneys sa diin ang LTFRB na ang may gahom sa pagpauntat sang byahe sang mga ini.
Sa tion nga ma-fully implement na ang modernization sang mga PUV, indi na mahimo nga makabyahe ang mga ini sa rota nga ginaagyan sang mga modernized jeepneys.
Ang mga traditional nga jeep ang himuon na lang nga private vehicle ukon ipa-scrap.
Nahibaluan nga nagwangal ang mga operators sang mga traditional jeepney nga may byahe Jaro Liko kag NFA bangud wala na gin-renew ang ila registration kag prangkisa.
Nakahanda naman suno sa natungdan nga baklon sang gobyerno ang mga traditional jeepneys.
