Indi na maka-agwanta ang mga jeepney drivers sa syudad sang Iloilo bangud sang asud-asud nga pagsaka sang presyo sang gatong nga ‘wala man gina-aktuhan sang gobyerno’.
Ini na ang ikaduha nga semana subong nga Oktubre nga may daku nga pagsaka sa presyo; ikapito na ini nga asud-asud nga semana sang price increase halin sang ulihi nga semana sang Agusto.
Sa interview sang Bombo Radyo kay Nick Dalisay, presidente sang Iloilo City Alliance of Drivers Associations (ICADA), iya ginpahayag nga wala na halos sang ginansya nga madala ang mga driver kun magpauli sila sa ila nga balay.
Suno kay Dalisay, nag-adjust na gani ang mga operator kag ginpanubuan na ang renta sang mga driver sa ila ginamaneho nga jeep.
Apang kun amo sini ang sitwasyon suno sa iya nga ginasuyop ang income sang mga driver kag ginapabay-an lang sang Department of Energy ang mga oil companies, mamigado na gid lang ang mga driver.
Nagaugyon ang ICADA sa iban man nga transport groups sa syudad nga maga-petisyon nga pasakaan ang plete sang mga pasahero ‘bisan piso na gid lang’ agud nga indi man masakit sa bulsa sang commuter.
