Nakaagi ka na sakay sa jeep sa Iloilo City nga may plastic barriers matuod apang wala man sa gihapon sang distansya ang mga pasahero?
Ini nga eksena sa pampubliko nga salakyan ang indi na bag-o ilabi na nga masobra isa ka tuig na ang COVID-19 pandemic.
Suno kay Philippine College Physicians (PCP) President Dr. Maricar Limpin, “wala sa gihapon sang pulos” bisan ano pa ka damo ang plastic barriers kun wala man lang sang physical distancing nga ginasunod ang mga pasahero.
Posible sa gihapon suno sa doktor nga maglapta ang virus ilabi na kun ginasalapay kag ginauyatan pa ang barriers.
Ini nga pahayag sang PCP president ang ginpamatian sang isa ka transport group sa Iloilo City.
Sa interview sang Bombo Radyo kay loilo City Loop Alliance of Jeepney Operators and Drivers’ Association ukon ICLAJODA President Mr. Raymundo “Boyet” Parcon, iya ginpahayag nga magadangop sila sa Land Transportation Franchising and Regulatory Board (LTFRB) Region VI sa Martes, Agusto 31.
Iga-rekomenda sang ICLAJODA sa pamunuan sang LTFRB nga kakason na ang mga barriers bangud sa baylo nga makabulig, diri pa nagatapik ang kagaw.
Igaplastar man sang grupo nga sa baylo nga may tayuyon nga flow ang hangin sa jeep, ginapunggan pa ini sang barrier ukon plastic covers.
Isa sa alternative nga ginalantaw sang grupo kun makakas na ang barriers amo nga butangan sang X ang mga pulungkuan nga indi pwede pungkuan; lubid ang gamiton agud nga maporma ang X.
Kun indi magsugot ang LTFRB, nakasugtan sang mga miyembro sang ICLAJODA nga bag-uhon ang plastic barriers sa ila units bangud tam-an na ini ka daan. ##
