ILOILO CITY – Nag-apelar ang pila ka mga transport groups sa Land Transportation Franchising and Regulatory Board nga pasakaan ang pamasahe sa tanan nga modes of public transportation sa bilog nga pungsod bangud sang nagasaka nga presyo sang gatong.
Sa sulat nga ginpadala kay Land Transportation Franchising and Regulatory Board chairperson Teofilo Guadiz III, naga-request sang fare increase nationwide ang Liga ng Transportasyon at Operators sa Pilipinas, Pagkakaisa ng mga Tsuper at Operators Nationwide, Stop & Go Transport Coalition, kag ang Federation of Jeepney Operators and Drivers Association of the Philippines.
P2 nga increase sa una nga apat ka kilometro ang gina-apela sang transport groups.
Suno sa grupo, tuman ka dako sang pagsaka sang presyo sang parts kag throttle body alignment nga kinahanglan agud nga masiguro ang safe kag kumportable nga transport service.
Magluwas pa diri ang indi makontrol nga pagsaka sang presyo sang diesel sa tagsa ka semana.
Sang Setyembre sang nagligad nga tuig, gin-aprubahan man sang ahensya ang fare increases para sa traditional and modern jeepneys, buses, taxis, kag transport network vehicle services.
Gin-aprubahan sang public land transportation regulator ang P1 nga provisional increase sa minimum fare para sa una nga apat ka kilometro sa traditional kag modern jeepneys.
Para sa mga public utility buses, gin-aprubahan man sang ahensya ang P2 uniformed base fare hike para sa city kag provincial buses sa una nga lima ka kilometro kag succeeding kilometer fare increase nga P0.35 tubtob P0.50 depende sa sahi sang bus.
Ang flagdown rate para sa taxi kag transport network vehicle services ang ginpasakaan man sang P5.00.
