ILOILO CITY – Nagahingyo sang konsiderasyon ang mga transport groups may kaangtanan sa istrikto nga pagpatuman sang curfew sa syudad sang Iloilo.
Sa interview sang Bombo Radyo kay Raymundo “Boyet” Parcon, Presidente sang Iloilo City Loop Alliance of Jeepney Operators and Drivers Association, iya ginpahayag nga kun tani, indi lang pagdakpon ang mga jeepney drivers nga tuyo na nga mag garahe apang naabutan lang sang curfew nga 8:00 sa gab-i.
Suno kay Parcon, bilang driver, katungdanan nila nga idul-ong ang mga pasahero apang gin-athag niya nga ang mga pasahero lamang nga magapauli ang pasakyon sang driver ilabi na kun madali na lang curfew.
Ginpahayag ni Parcon nga apisar mabudlay para sa tanan nga operators kag drivers apang wala sila sang may mahimo bangud nga ang pagpatemprano sang curfew ang kabahin sang minimum health protocol.
May kaangtanan naman sa mandatory nga “No Face Shield, No Ride Policy” epektibo Agusto 15, ginpahayag ni Pacron nga naghingyo sila sa Land Transportation Office kag sa Land Transportation Franchising and Regulatory Board nga kun tani, hatagan sang konsiderasyon ang mga drivers nga may deperensya sa panan-awan.
Sa pagpaathag ni Parcon, mabudlay para sa iban nga driver nga nagasuksok sang eye glasses nga magsuksok pa gid sang face shield lakip na sang face mask bangud indi maathag ang ila panan-awan kag mahimo ini nga tunaan sang aksidente.
