Kadungan sang pagkomemorar sang Bonifacio Day subong nga adlaw, ginpadayon sang pila ka transport groups ang vigil protest agud pamatukan ang deadline sang extension sang compulsory consolidation para sa mga public utility vehicles nga gintalana kahapon, Nobyembre 29.
Sa interview sang Bombo Radyo kay Elmer Forro, lead convenor sang No to PUV phaseout coalition, iya ginpahayag nga nangin inutil ang Cooperative Development Authority kag Land Transportation Franchising and Regulatory Board sa paghatag sang solusyon sa mga reklamo sang mga myembro sang kooperatiba.
Suno kay Forro, may magasulod man nga Electric Bus Rapid Transit nga ginapanag-iyahan sang pribado nga mga dumuluong nga kompanya nga magapanginpulos sa Public Utility Vehicle Modernization Program.
Suno pa sa natungdan, sa subong, maathag nga ang Public Utility Vehicle Modernization Program ang may katuyuan nga gub-on ang palangabuhian kag pabudlayan ang mga operators kag drivers sang traditional PUJs, agawon ang ila nga mga ruta kabaylo sang pagpabor sa dalagko nga mga korporasyon.
Nahibalaun nga ang nasambit nga vigil protest ang dululungan nga ginpatigayon sa pila ka mga lugar sa Pilipinas sa pagpanguna sang Manibela kag Piston.
Katuyuan sang protesta nga depensahan ang palangabuhian sang operators kag drivers sang traditional nga mga PUJ sa pungsod.
