ILOILO CITY – Magapasaka man sang petisyon ang mga transport groups sa siyudad sang Iloilo agud hingyuon ang pag-suspend sang pila ka mga provision sang Tax Reform for Acceleration and Inclusion (TRAIN) Law.
Suno kay Reymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA), doble ang epekto sa ila nga mga drivers sang TRAIN Law.
Sa pagtaas sang presyo sang produktong petrolyo, nag-gamay ang ila ginadala pauli para sa ila pamilya suno kay Parcon.
Apang bangud sang pagmahal sang mga balaklon nga epekto man sang TRAIN Law, haluson na sila makabakal sang ila pagkaon kag kinahanglanon sa panimalay.
Bangud sini, hingyuon sang transport groups nga i-suspend ang provision sang layi nga nagapatuman sang dugang nga buwis sa petroleum products.