Nagapangabay ang transport groups sa syudad sang Iloilo sa Land Transportation Office (LTO) kag Land Transportation Franchising and Regulatory Board (LTFRB) nga mangin madasig sa pagpaguwa sang update tuhoy sa “one seat apart policy” sa pampubliko nga transportasyon.
Sa interview sang Bombo Radyo kay Edgar Salarda, presidente sang Pinagkaisang Samahan ng mga Tsuper at Operator Nationwide (PISTON-Panay), iya ginpahayag nga Oktubre 5 na ipatuman ang 1 meter pysical distance sa sulod sang salakyan apang wala pa sang maathag nga guidelines halin sa mga concerned agencies.
Suno kay Salarda, nagatinguha siya nga makapakig-angot sa LTO kag LTFRB apang tubtob subong wala siya sa gihapon nakakuha sang update.
Nagapinamangkutanay na lang ang mga driver kun ano ang ila himuon sa Oktubre 5 bangud base naman sa guidelines nga ginpaguwa ni Iloilo City Mayror Jerry Treñas, pahanugutan na ng 50 percent capacity sa mga pasahero nga makasakay sa pampubliko nga transportasyon ilabi na subong nga yara sa General Community Quarantine status ang syudad.
Kun ang direktiba ni Mayor Treñas ang sundon sang mga driver, bentaha ini kuntani.
Pahayag niya, indi na posible pa nga pasakaan ang plete kun ipabilin na lang ang 50 percent capacity sa mga pasahero.
Sa subong, nagahulat sa gihapon si Salarda sa impormasyon ukon plano sang LTO kag LTFRB sa mangin sitwasyon sang mga public transportation sa Lunes.
