Gindesisyunan sang mayorya sang transport cooperatives sa syudad sang Iloilo nga mag-updanay sa pagpatigayon sang transport holiday sa Lunes, Marso 23.
Ginkumpirma ini ni Mr. Raymundo “Boyet” Parcon, chairman sang Western Visayas Transport Cooperative (WVTC), kasunod sang ila pagpatigayon sang pagsinapol subong nga adlaw.
“Majority gid, kag basi tanan nga ruta, by Monday, wala sang may ma-byahe, upod sa aton nga traditional nga mga jeep nga mauntat man sa byahe, kay subong kawsa na ni namon tanan,” suno kay Parcon.
Sa bahin sang WVTC, nagabyahe ang modernized units sini sa apat ka mga ruta sa syudad nga amo ang Tagbak Terminal, Mohon Terminal, Diversion Highway, kag Jaro CPU.
Sa interview sang Bombo Radyo kay Parcon, iya ginpahayag nga padayon pa ang ila pagpanawag sa dugang nga mga grupo agud mag-upod sa sini nga kawsa.
Pahayag sini, pila ka semana na sila nga nagahipos apang wala man sang gihapon sang mehura bangud wala gihapon sang suporta nga nagatupa kag gin-suspende man ang ila ginahingyo nga saka sa plete.
Nauna na nga ginpahayag ni Parcon nga lab-ot na sa P100,000 ang ginapamyerdehan sang WVTC kada adlaw bangud sang pagtimbuok sa presyo sang gatong.
Kun basehan ang oil industry estimates, posible nga magdangat na sa P130 ang presyo sang diesel sa masunod nga semana, samtang magalapaw naman sa P100 ang kada litro sang gasolina bangud sang panibag-o nga oil price hike.
MGA GINAHINGYO SANG TRANSPORT COOPERATIVES
Ipanawagan sang transport cooperatives ang pagpasaka sang plete kadungan sang transport holiday.
Suno kay Parcon, ang fare increase amo ang makabulig sa ila bilang “pang-sapin-sapin” lang samtang tuman ka taas ang presyo sang diesel.
“Ang number one nga ginapangayo naton amo ni ang pagpasaka sang plete. Kuntani pasakaan ini sang seven pesos [provisional fare increase]. Temporary lang ini. Kun mag-normal na, ibalik man naton sa normal ang pletehan. Sa subong, importante lang sa tanan nga may suporta lang o kapital o pang-sapin-sapin man sa amon nga para man sa pagserbisyo sa mga pumuluyo kag commuters para nga maka-sustain man kami sa sige-sige nga saka sang diesel,” suno kay Parcon.
Ginpahayag sini nga gintawtawan lang sila sang pasalig nga may subsidiya, apang tubtub subong, bisan tatlo ka semana na ang gyera sa Middle East, wala gihapon sang ayuda nga nabaton halin sa gobyerno.
“Indi gid namon kaya kag bisan ang pagbakal sang diesel kay tama gid ka mahal,” pahayag sini.
Nakahibalo man ini nga madamo ang maapektuhan kun indi sila magbyahe, apang nagapanindugan siya nga paagi ini agud nga pamatian sila sang gobyerno.
“[Kami sa WVTC], nagapamyerdehan kami sang P100,000 a day. Diin kami makuha sina kun indi kami mag-pressure sa gobyerno nga dapat pamatian kami? Kun transport kami, once mag-untat kami byahe, kadamo sang maapektuhan nga mga pasahero,” pahayag pa ni Parcon.
Nagdugang man ini nga preparado man sila sa posible nga show cause order ukon kun ano ang mangin akto sang gobyerno sa ila himuon nga transport holiday.
“Ini nga kawsa indi lang ni basta-basta. Gutom na ang mga operators kag drivers subong. Updan namon ini nga kawsa subong, wala na kami subong nakulbaan bisan i-cancel ukon i-revoke ang amon prangkisa,” dugang niya.
