Wala nakaupod ang transport groups sa Iloilo sa tatlo ka adlaw nga nationwide transport strike sang Manibela batok sa kontrobersyal nga public utility vehicle modernization program (PUVMP) sang gobyerno.
Ini nga strike nga nagsugod sang Myerkules ang gin-anunsyo sang nagligad nga semana matapos nga ginbasura ni President Ferdinand “Bongbong” Marcos Jr. ang resolution sang Senado nga nagahingyo kuntani sang suspension sa modernization program.
Sa interview sang Bombo Radyo kay Mr. Elmer Forro, lead convenor sang No To PUV Phaseout Coalition-Panay, iya ginpahayag nga nagkulang sila sa preparasyon kag wala man nakaabiso sa commuters ukon riding public kaangot sa strike.
Sa baylo nga transport strike, naghimo na lamang sang protest action ang mga transport group sa Sunburst Park sa Iloilo City Proper.
Duha ka adlaw ini nga rally suno kay Forro kag magasapol sila buwas kun ano ang ila mangin lihok sa masunod nga semana.
Nagsugod naman sanday Forro sang petition signing batok sa Public Transport Modernization Program kun sa diin ginahingyo man nga ibalik ang lima ka tuig nga indibidwal nga prangkisa kag ibasura ang mandatory franchise consolidation.
