Ginaproblema subong sang transport groups sa syudad ang pagsulundan kun sa diin masulod ang fuel subsidy nga ila mabaton sa masunod nga semana.
Nahibalu-an nga gin-download na sang Departmnet of Budget and Management (DBM) ang P2.5 billion nga pondo para sa fuel subsidy.
Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Owners and Drivers Association ( ICLAJODA) kag chairperson sang Western Visayas Transport Cooperative, iya ginpahayag nga dugang man nga problema ang pila ka mga drivers kag operators nga wala sa gihapon sang pasada card.
Suno kay Parcon, indi makakuha sang fuel subsidy nga P6,000 ang drivers nga wala sang pasada card.
Una na suno sa iya nga nagpasalig si Land Transportation Franchising and Regulatory Board (LTFRB) Region 6 Director Richard Osmeña nga iya himuan sang paagi agud nga mahatagan sang pasada card ang mga drivers bag-o pa mag-abot ang subsidy.
Dugang pa ni Parcon, ang amo nga subsidy ang paumpaw lang sa ila nga petisyon nga i-suspende ang excise tax kag Value-Added Tax (VAT) sa mga produktong petrolyo.
Suno kay Parcon ang subsidy ang kaisa lang ka beses nga makabulig sa mga drivers, apang ang pag-suspende sang tax ang dako nga bulig indi lang sa mga drivers gundi lakip na ang iban pa nga apektado man sa padayon nga pagsaka sa presyo sang gatong.
