ILOILO CITY – Handa ang Iloilo City Loop Alliance of Jeepney Owners and Drivers Association (ICLAJODA) nga magtambong kun ipatawag sang Iloilo City Council sa isa ka public hearing.
Ini ang may kaangtanan sa pagpahamtang sang terminal hub sa Iloilo Business Park Area sa diin nag-umpisa na sa pagbiyahe ang mga Point to Point (P2P) Buses kag modernized vehicles.
Sa interview sang Bombo Radyo kay Raymundo ‘Boyet’ Parcon, presidente sang ICLAJODA, iya ginpahayag nga nahangpan man nila kun nga-a pahamtangan sang terminal hub sa area sang Iloilo Business Park apang wala nila ginlauman nga pahamtangan sang P2P buses ang nasambit nga terminal.
Ginpahayag ni Parcon nga ang pagpahamtang sang terminal hub sa nasambit nga area ang para man sa kaayuhan sang mga negosyante apang kun tani, indi man mabutang sa alang-alang ang mga transport group sa syudad.
Isa man sa ginakahangaw-an nila suno kay Parcon amo nga ang mga salakyan nga kutub lamang sa terminal sa San Pedro, Molo ang halinon sa terminal hub sa Iloilo Business Park.
Ginpahayag sang natungdan nga bag-o matuman ang nasambit nga plano, kinahanglan anay nga ilisan ang kaundan sang Perimeter Boundary Ordinance.
Samtang, nagapaganot naman ang mga transport group sa syudad sang Iloilo samtang nagahilapit ang deadline sa pag-ilis sa mga daan nga mga Public Utility Jeepney (PUJ).
Suno kay Parcon, kutub na lang sa Hunyo 2020 ang kahigayunan sang mga transport operators nga makatukod sang kooperatiba kag sa pagproseso sa pagbakal sang modernized jeepney.
Ginpahayag ni Parcon nga para sa mga magagmay nga transport operators, tuman ini ka budlay nga matuman bangud nga nagakinahanglan sang kapital bag-o makatukod sang kooperatiba.
Magluwas diri, ginpahayag man sang natungdan nga tuman ka mahal ang isa ka unit sang modernized jeepney.
