ILOILO – Wala nakahibalo ang mga transport group sa syudad sang Iloilo nga maga-umpisa na ang pagtukod sang Ungka II Flyover sa Brgy. Ungka II, Pavia, Iloilo.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Owners and Drivers Association, iya ginpahayag nga nakibot na lang sila nga mga driver sang gin-umpisahan na ang pagtukod sang nasambit nga proyekto nga nagtuga sang pagpugok sang trapiko.
Suno kay Parcon, mas makapaayo kun tani kun sa tion sang summer gin-umpisahan ang proyekto agud nga wala sang klase kag gamay ang mga salakyan nga naga-agi sa nasambit nga lugar.
Smatang, makalulu-oy suno kay Parcon ang mga driver bangud sa pagpangakig sang mga pasahero matapos nga ginlimitahan ang Loading kag Unloading areas sa Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Ginpahayag ni Parcon nga kun sadto, nagalab-ot sa apat ang Loading kag Unloadiung areas sa 14-kilometer stretch sang Diversion Road apang sa subong, yara na gid lamang sang duha ka palanaugan kag balantayan sang jeep.
Bangud sini, ginpahayag sang natungdan nga madamu sang mga pasahero ang nagareklamo apang sila nga mga driver ang wala sang may mahimo kundi sundon ang ordinansa.
