Ginkalipay sang Transport kag Cause-Oriented Groups, ang pagkonsiderar sang Department of Transportation (DOTR) sa liwat nga pagbyahe sang mga unconsolidated jeepney drivers.
Sa interview sang Bombo Radyo kay Elmer Forro Lead Convenor sang Panay-Negros United Transport Coalition, iya ginpahayag nga ginakabig ini nga isa ka kadalag-an, matapos ang pila naman ka beses sila nagprotesta.
Suno kay Forro, nangin madinalag-on ang ila hingyo bangud man sang padayun nga paghugpong sang mga drivers kag operators.
Nagpanawagan man ini sa mga myembro sang kooperatiba nga maghalin na kun indi nila gusto nga maglala ang sitwasyon ilabi na sa kun may may mahibaluan nga nagakahanabo nga korupsyon.
Samtang, nagpangabay man si Forro kay Iloilo City Mayor Jerry Treñas nga pauntaton ang pagpatuman sang Local Public Transport Route Plan (LPTRP) sa syudad.
Magluwas diri, naghingyo man ini kay Iloilo Governor Arthur Defensor, Jr. nga indi na pag-ipatuman ang LPTRP sa probinsya sang Iloilo.
