Wala pa ginabaton sang Iloilo City Government ang proposal sa transport modernization kag ginapahanugutan pa ang dugang nga pagtuon kag pagbinaylohanay sang opinyon agud masiguro nga indi na liwat masugata ang mga problema nga naeksperyensyahan sa implementasyon sang Public Transport Modernization Program (PTMP).
Sa interview sang Bombo Radyo kay Iloilo City Councilor Atty. Sedfrey Cabaluna, iya ginpahayag nga bukas ang ginpatigayon nga convention sa tanan nga opinyon, lakip ang mga pagpangduhaduha kag kabalaka sang nagkalain-lain nga sektor, ilabi na sang mga progresibo nga grupo nga nagaprotektar sang pangabuhian sang mga drayber kag operator.
Suno kay Cabaluna bilang Chairperson sang Committee on Transportation, gin-encourage man nila ang mga partisipante nga magpabilin sa convention agud magpadayon ang pagbinaylohay sang mga panan-aw, apang ginatahod man nila ang desisyon sang mga naghalin matapos makapahayag sang ila mga opinyon kag pamangkot.
Ginpahayag man niya nga ang mga position paper nga ginpasa sang transport groups, lakip ang mga ginpresentar ni No to Phaseout Coalition-Panay Lead Convenor Elmer Forro, nangin basehan sang nagkalain-lain nga isyu nga ginpatuhoy sa Department of Transportation (DOTr) kag World Bank Group.
Ginpabutyag man ni Cabaluna nga indi man kontra sa transport modernization ang pila ka transport groups, apang ginakabalak-an nila ang posible nga epekto sini sa pangabuhian sang ila mga miyembro.
Lakip sa mga ginapahanumdom nga dapat masabat sang proposal amo ang pagpilit sa mga drayber kag operator nga magkooperatiba, ang pagpangutang agud makakuha sang modernized nga mga salakyan, kag ang kakulang sang subsidy para sa pagbag-o sang ila mga fleet.
Dugang pa ni Cabaluna, kinahanglan nga masolbar anay ini nga mga problema sa ginpresentar nga proposal. Gin-istoryahan man ang mga problema sa transportasyon sa Iloilo City nga ginpahayag na sa mga position paper ni Forro kag iban pa nga transport groups.
Ginpahayag man nga isa sa mga direksyon nga gindiskusyonan amo ang pagbalhin sang pokus halin sa pag-modernize lamang sang mga jeepney pakadto sa mas malapad nga modernization sang transport services agud mas mapauswag ang sistema kag serbisyo sa mga pasahero.
Dugang pa niya, nahibaluan sang World Bank kag DOTr nga madamo pa sang pamangkot nga kinahanglan sabton antes magdesisyon ang siyudad. Kinahanglan nga masiguro nga indi na liwat madoble ang mga problema nga nagluntad sa una nga implementasyon sang PTMP.
Suno sa iya, dapat sang 2016, sang una nga ginpresentar ang programa, gin-usisa na kuntani sing maid-id ang mga detalye antes ini ginpatuman.
Apang sa karon, ginpahayag niya nga may oportunidad ang Iloilo City nga maghimo sang mas maayo nga pamaagi kag mangin benchmark para sa iban pa nga local government units sa pagpauswag sang pampubliko nga transportasyon.
Ginpahayag niya nga dapat mangin prayoridad ang kaayuhan sang mga commuter, samtang ginakabig man nga importante ang pagproteher sa pangabuhian sang transport sector.
Text by: Bombo Cyrene A. Nasis
