Nagpasalig ang Philippine National Police (PNP) nga magpatuman sang maximum tolerance sa tanan nga public transport drivers kag operators nga magapartisipar sa rally kadungan sang pag-umpisa sang isa ka semana nga untat-byahe.
Suno kay PNP Spokesperson PCol. Jean Fajardo, 80 percent sang personnel ang naka-standby kag handa nga i-deploy.
May mga pulis man nga ibutang sa mga public transport terminals kag sa mga lolasyon kun sa diin available ang free rides sa mga pasahero.
Una na nga nagpahayag ang Malacañang nga magapadala ang PNP sang 60 ka mga salakyan agud nga mabuligan ang stranded nga mga pasahero, apang gin-athag ni Fajardo nga mangin available lang ini nga mga salakyan depende sa pagkinahanglan.
Ginabanta 100 personnel halin sa Armed Forces of the Philippines kag sa Department of National Defense kag 30 vehicles ang iga-deploy man para sa inter-agency monitoring team sa transport strike.
Nahibaluan nga linibo ka mga driver kag operator halin sa Manibela kag Piston ang ginalauman nga magapasakop sa strike sa NCR halin subong nga adlaw tubtub sa Marso 12 agud nga pamatukan ang jeepney phaseout. ##
