Nakit-an ni Iloilo City Mayor Jerry Treñas ang punto sa pagduso sang transport summit antes ipasa liwat sa Land Transportation Franchising and Regulatory Board (LTFRB) ang amended Local Public Transport Route Plan (LPTRP) sang syudad, kag nakit-an man sini ang punto ni lone opposition City Councilor Plaridel Nava sa paghikay sa amo nga resolution.
Si Councilor Atty. Sedfrey Cabaluna, bag-o nga chairman sang Committee on Transportation, ang nagduso sini nga resolution agud hingyuon kay Iloilo City Mayor Jerry Treñas nga mag-facilitate sang summit.
Ang transport summit amo ang ginalantaw nga paagi agud nga matipon ang mga suhestyon kag concerns nga ginpalab-ot sang publiko kaangot sa LPTRP.
Nag-react diri si Nava sang nahambalan ini sa konseho.
“I find this [resolution] very ridiculous — if not funny. The people have suffered and this is only the time that we will conduct a consultation? In effect, by filing this resolution , this is a very clear admission that we implemented a certain ordinance, we passed a certain ordinance and implemented it without prior consultation. We again put the cart ahead of the horse. Mas una pa ang karosa sangsa kabayo. Pasar anay antes konsultasyon,” suno sa opposition councilor.
Suno naman nga nag-depensa diri ang anay chair sang Committee on Transportation, si Atty. Rommel Duron, nga nagpahayag nga “may proper consultation” nga ginhimo sang iya ang naga-uyat sa komitiba. Suno kay Duron, naglawig sang duha ka tuig ang ginpatigayon nga serye sang konsultasyon nga gintambungan man sang tanan nga sektor antes ginpasar ang LPTRP.
Sa interview naman sang Bombo Radyo sa alkalde, iya ginpahayag nga indi naman kuntani kinahanglan ang resolution agud mapatigayon ang transport summit.
May kaangtanan sa pahayag ni Nava, sabat sang alkalde, “May punto man na. Si Sedfrey may punto man. Ang mga amo ni nga bagay, indi na kinahanglan ang resolution. Kadtuan lang ko sa opisina ko kay kanugon sang papel nga ipadala pa sa akon. Kun ako man lang ang gusto nila nga istoryahon, kadtuan lang ko nila kay pwede man ko nila maistorya.”
Wala pa nabaton sang alkalde ang resolution. Ginpahayag sini nga konsultahon man niya si Public Safety and Transportation Management Office (PSTMO) head Mr. Jeck Conlu kag retired Police Colonel Uldarico Garbanzos, ang Executive Assistant (EA) for Community Welfare.
