ILOILO CITY – Bukas sa publiko ang patigayunon nga transport summit sang syudad sang Iloilo sa Agosto 30 sa University of the Philippines in the Visayas- Iloilo City Campus.
Sa interview sang Bombo Radyo kay Iloilo City Councilor Atty. Sedfrey Cabaluna, chairman sang Committee on Transportation sa Iloilo City Council, iya ginpahayag nga sa sini nga aktibidad, iplastar sang technical working group ang halos kumpleto na kag na-amyendaran na nga modified Local Public Transport Route Plan (LPTRP) sang syudad.
Sang Agosto 16, ginpatigayon ang katapusan nga hugnat sang consultation sa nanari-sari nga sektor.
Ang resulta sang mga konsultasyon ang gin-consolidate kag amo ang nangin basehan sa pag-amyendar sang naga-eksister na nga LPTRP.
Kadungan sang summit, may yara sang patigayunon nga workshop para sa dugang nga mga inputs kun may yara gid man.
Pagkatapos sini, i-finalize na ang LPTRP kag ipasa sa Department of Transportation (DOTr) para sa approval.
Kabahin sang mga imbitado magluwas sa nanari-sari nga sektor amo ang mga lokal nga opisyal sang syudad, Land Transportation Office (LTO), Land Transportation Franchising and Regulatory Board (LTFRB), kag DOTr-Central Office.
Imbitaron man ang technical working group sang probinsya agud nga magplastar sang pila ka provision sang ila ginadihon nga LPTRP ilabi na ang mga ruta nga konektado sa syudad.
Sa ikaduha nga semana sang Septyembre target nga ipasa sang syudad ang LPTRP sa DOTr para sa final approval.
