ILOILO CITY – Madamo pa sang dapat nga bag-uhon kun transportation system sa syudad sang Iloilo ang pagahambalan ilabi na kun may ginapatigayon nga kahiwatan.
Ini ang kasunod sang na-eksperyensyahan nga huol sang mga motorista kag commuters bangud sa traffic rerouting kag road closure may kaangtanan sa Dinagyang Festival 2020.
Sa interview sang Bombo Radyo kay Iloilo City Councilor Romel Duron, chairman sang Committee on Transportation, iya ginpahayag nga mas makapaayo nga antes pa man ang pagpatuman sang traffic rerouting kag road closure, nagakadapat nga may yara sang information dissemination.
Suno kay Duron, magluwas sa pagpahibalo, dapat nga ang mga motorista kag commuter ang may yara sang disiplina agud nga malikawan ukon indi na magdugang ang traffic congestion.
Isa man sa rason nga ginplastar ni Duron amo nga dapat may yara sang traffic enforcer nga nagabantay ilabi na sa mayor nga dalan sang syudad.
Kadungan sini, ginpahayag sang natungdan nga may yara na sang kompaniya nga nagpabutyag nga magpahamtang sang Bus Rapid Transit kag may yara naman sang P5 million nga pondo ang pagpatigayon sang survey para sa Local Public Transport Route Plan may kaangtanan sa modernization program.
Ang nasambit nga plano ang paga-istoryahan sa committee hearing nga patigayunon sa Pebrero 4.
