Iloilo City – Mas nagmag-an na ang dalagan sang trapiko sa Ungka flyover subong nga adlaw kun ipaanggid sa natabo kahapon.
Sa interview sang Bombo Radyo kay Mr. Jeck Conlu, pinuno Public Safety and Transportation Management Office, iya ginpahayag nga ginbalik na ang stop and go scheme sa ruta sang Pavia – Iloilo and vice versa agud indi matam-an ang pagpugok sang trapiko.
Suno kay Conlu, may gin-deploy ang Iloilo City Government nga 20 ka mga personnel agud magbulig sa pag-manage sa mga salakyan.
Ginalauman naman sang natungdan nga dalayon nga mabuksan ang road widening sa lugar agud mahatagan sang ligwa ang mga tanan nga motorista.
Kun balik-balikan, ginsiraduhan ang nasambit nga flyover halin sang Septyembre 18, 2022 bangud sa vertical displacement kag humalin sadto, malala nga traffic congestion ang maeksperyensiyahan halos adlaw-adlaw.
