ILOILO CITY – Indi pa gihapon makasulod sa Western Visayas ang mga locally stranded individuals nga wala sang ginauyatan nga travel authority, medical certificate, kag Certificate of Acceptance.
Ini ang nakasugtan sang mga local government units kag nakasaad sa Joint Resolution No. 003 nga gin-isyu sang Regional Inter-Agency Task Force kag Regional Task Force kahapon, Pebrero 28.
Sa interview sang Bombo Radyo kay Ma. Aletha Nogra, spokesperson sang Regional Taskforce for COVID-19, iya ginpahayag nga magapabilin ang tanan nga travel requirements nga gina-require sang tagsa ka LGU sa Western Visayas para sa LSIs samtang wala pa nahitso ang plan of action sang National Inter-Agency Task Force may kaangtanan sa Uniform Travel Protocols.
Matandaan nga sa idalom sang Resolution Number 101 ukon Uniform Travel Protocols nga gin-isyu sang IATF sang Pebrero 26, nakasaad nga indi na kinahanglan ang COVID-19 testing, quarantine, travel authority kag medical certificate sa pagbyahe sang mga domestic travelers.
Ang COVID-19 testing kag quarantine ang patigayunon lang kun ini ang required sang LGU-point of destination.
Sa subong, indi pa kumpleto ukon gina-finalize pa lang ang Safe, Swift and Smart Passage (S-PaSS) Travel Management System sang Department of Science and Technology nga amo ang magaserbe bilang one-stop-shop application kag communication para sa travelers.
Gina-finalize man ang StaySafe.ph System nga amo naman ang gamiton bilang primary contact tracing system.
Suno kay Nogra, samtang ginahikot pa lang ining bag-o nga mga sistema, ‘status quo’ lang anay ang mga requirements sa pagbyahe sa mga LSIs.
Ginamanduan man subong ang LGUs nga maghanda sa full utilization sang S-PaSS kag StaySafe.ph Systems sa ila tagsa ka lokalidad.
