Wala sang pangatubangon nga kaso kriminal ang American rapper nga si Travis Scott apisar nga 10 ka tawo ang napatay sa iya concert sa Texas sa Estados Unidos sang Nobyembre 2021.
Madumduman nga 50,000 ka mga tawo ang naggilinutok sa NRG Park sa Houston para sa Astroworld music festival sang amo nga tuig sang hinali lang nagdis-uganay ang mga tawo sa entablado sang naga-perform na ang rapper.
Bangud kulang ang hangin kag espasyo, ginatos ang na-samaran, may mga nagkalalipong, kag 10 ang patay lakip na ang siyam ka tuig nga bata.
Apisar sang mga nagpakitluoy kag nagpangayo sang tabang, nadugayan pa antes nadesisyunan sang organizers nga untaton ang music kag mag-evacuate sa area.
Suno sa Houston grand jury, masubo man nga may 10 ka kabuhi nga nadula samtang naga-enjoy lang kuntani sa musika kag entertainment; apang suno sa korte, indi man tanan nga trahedya makabig nga krimen, kag indi tanan nga kamatayon, makabig nga homicide.
Nahibaluan nga antes ang desisyon, sampaw sampaw nga kaso ang ginpasaka batok sa Astroworld festival organizers bangud sa kapalpakan nga siguruhon ang safety sang concertgoers.
Ang ruling sang korte amo lamang ang para sa criminal proceedings, samtang mahimo nga mapadayon ang civil lawsuits.
