Ginpanginwala ni Mayor Jerry Treñas, nga siya ang sa likod sang pagpasaka sang kaso ni former Iloilo City Councilor Plaridel Nava tuhoy sa ‘unexplained wealth’ ni Iloilo City Lone District Representative Julienne “Jamjam” Baronda sa Office of the Ombudsman Regional Office VI.
Sa interview sang Bombo Radyo kay Treñas, iya ginpahayag nga kaugalingon nga desisyon ni Nava ang pagpasaka sang kaso batok kay Baronda.
Suno kay Treñas, apisar nagasuporta si Nava sa kandidatora sang iya anak nga si Mayoralty candidate Raisa Treñas, wala ini siya labot sa lihok nga gina-ubra ni anay konsehal.
Ginpahayag sang alkalde nga natural lang sa isa ka kandidato nga mapasakaan sang kaso sa Office of the Ombudsman ilabi na kun may nagakwestyon sa mga tago nga manggad ukon sa pagpalakat sini bilang isa ka politiko.
Dugang pa ni Treñas, wala sang rason nga suguon sini si Nava nga pasakaan sang kaso si Baronda bangud para sa iya ‘sure win’ na ang iya anak sa pagpadalagan sini sa pagka-alkalde.
Nahibaluan nga ginakwestyon ni Nava kung paano nasarangan ni Baronda nga magbakal sang mga malahalon nga luxuries, condominium, salakyan, housing unit, kag iban pa.
Gintumod man sini nga antes na-eleher bilang kongresista si Baronda, isa lamang ini ka kontrakwal nga empleyado ni Senator JV Ejercito nga nagasweldo sang P15,000 kada bulan.
