Gin-athag ni Iloilo City Mayor Jerry Treñas nga indi matuod ang nagalapta nga impormasyon nga may nagbayad sa iya agud nga “magbaylo sang color” ukon lainon ang iya suportahan nga presidential aspirant sa 2022 elections.
Ang nagalagaw nga mensahe ang nagpahayag nga may gin-offer nga kantidad kay Treñas agud suportahan ang ‘certain’ nga kandidato sa pagka-presidente, apang wala niya ginbaton.
“Gintanyagan kuno ako [sang kuwarta] kag wala ko ginbaton. It’s really unfair both to me and to them, kag gusto ko lang klaruhon nga wala ina natabo,” suno sa alkalde.
Sa mga nagakomento naman nga may nanostisyaran nga “pag-lain sang color” sa syudad sang Iloilo, pahayag sang alkalde, “Ang akon pagsuporta kay Vice President Leni [Robredo], ara gid, very strong. I am a die hard Kakampink.”
Nagpamalibad na si Treñas nga hingadlan kun sin-o ang presidential aspirant nga nadalahig sa naglapta nga balita. ##(Photo Courtesy: Jamjam Baronda/FB)
