ILOILO CITY – Maga-file si Iloilo City Mayor Jerry Treñas sang criminal complaint batok sa Capiz Provincial Government bangud sa pagbutang sang nasambit nga probinsya sang border restrictions sa mga cargo nga nagikan sa syudad sang Iloilo.
Sa interview sang Bombo Radyo kay Treñas, iya ginpahayag nga tuman ang iya pagkadismaya bangud wala sa guidelines sang Inter-Agency Task Force (IATF) ang amo nga mandu sang probinsya sang Capiz.
Ginpahayag ni Treñas nga i-file niya ang nasambit nga reklamo kaupod ang Regional Inter-Agency Task Force (RIATF).
Nahibaluan nga magluwas diri, may bag-o nga pagsulundan ang Capiz Provincial Government epektibo kahapon nga adlaw, Agosto 16, kun sa diin kabigon na nga Locally Stranded Individuals (LSIs) ang tanan nga tawo nga halin sa syudad sang Iloilo nga mag-abot sa ila nga lugar.
Ang amo nga mga LSIs ang kinahanglan man magpaidalom sa 14 ka adlaw nga mandatory facility quarantine kag kinahanglan magpakita sang valid ID, medical certificate, letter of acceptance kag travel authority.
Ini nga pagsulundan ang ginmandu sa amo nga probinsya matapos ginpatuman ang General Community Quarantine (GCQ) ukon mas mataas nga qurantine classification sa syudad sang Iloilo.
CAPIZ PROV’L GOV’T: ‘WE HAVE NOTHING AGAINST ILOILO CITY’
Samtang, nagdepensa naman si Capiz Governor Esteban ‘Nonoy’ Contreras nga ginpatuman ang istrikto nga border restrictions agud malikawan ang dugang nga local transmission sang COVID-19.
Sa interview sang Bombo Radyo kay Contreras, iya ginpahayag nga indi man ini isa ka criminal offense bangud ginatamingan lang ang taga-probinsya sang Capiz.
Sa bahin sang cargoes, ginpahayag ni Contreras nga nakabaton na siya sang tawag nagikan sa IATF nga nagahingyo nga i-adjust nila ang restriction sa cargo.
Ginpaathag sang gobernador nga may yara lang sang gamay nga wala sang paghangpanay ilabi na bangud wala lang naathag kun ano ang nabutang sa infographics.
Sa subong suno kay Contreras, ginahitso na sang legal team ang pag-lift sa restriction para sa mga cargo nga nagikan sa Iloilo nga nagapadulong ukon bisan nagalabay lang sa probinsya sang Capiz.
Gin-athag man sang gobernador nga para sa mga magahalin sa Capiz kag magapadulong sa Iloilo, kinahanglan lamang nila mag-presentar sang medical certificate sa ila pagpauli sa Capiz kun sila ang magabalik man gilayon.
Apang kun indi man lang importante ang transakyon sa Iloilo, mas maayo suno kay Contreras nga ipaway lang ang travel agud malikawan ang infection.
Para naman sa mga residente sang Capiz nga yara subong nagatinir sa Iloilo, sila ang kabigon gid nga LSIs kag kinahanglan ipaidalom sa 14 ka adlaw nga quarantine kun sila ang magpauli sa probinsya sang Capiz.
Sa pamangkot kun bala nakapangonseho man siya kay Iloilo Governor Arthur Defensor Jr. kag kay Iloilo City Mayor Jerry Treñas antes ginpapanaug ang executive order, ginpahayag ni Governor Contreras nga ang amo nga pagsulundan ang gindihon sang Capiz IATF.
Gin-athag man sang gobernador nga mangin epektibo ang amo nga executive order tubtob sa Agosto 31.
