Liwat nga nag-apelar si Mayor Jerry Treñas sa publiko nga magkooperar gid kag magsunod sa minimum public health standards bangud labi pa nga nagasaka ang COVID-19 cases sa Iloilo City nga subong napaidalom sa modified enhanced community quarantine (MECQ).
Sa statement sang alkalde nga naka-post sa Facebook, ginpahayag sini nga puno na gid ang mga hospital beds para sa mga pasyente nga admitted bangud sa COVID-19. “Indi lango-lango ang risgo kag balatian.
Bilang isa ka amay, daku ang akon pagkabalaka para sa aton tanan,” pahayag sang alkalde. Mierkules, Mayo 26, sang ginpatuman ang border control sa Iloilo City agud mapat-od nga essential purposes lang ang rason sang pagsulod sa syudad.
Ginbalik man ang liquor ban.
Ang curfew hours ang ginset umpisa 10:00 sa gab-i tubtob 4:00 sa kaagahon. Padayon man ang vaccine rollout.
“We need to bring the numbers down, maobra naton ini kun ara ang kooperasyon sang tanan,” apelar ni Treñas.
Santo sa data sang Department of Health Region VI, ang Iloilo City ang nakarecord na sang 1,254 ka active cases sang coronavirus.
