ILOILO CITY – Ginpaathag liwat sang Iloilo City Government nga ginalikawan lang ang mass gathering rason nga gina-utay-utay ang paghatag sang ayuda ukon Assistance to Individuals in Crisis Situation (AICS) cash aid.
Ini ang sa tunga sang wangal sang mga pumuluyo kun ngaa Agusto 4 pa sang nagsugod ang payout sa syudad apang tubtub subong madamo gihapon ang wala nahatagan sang kwarta.
Sa pagkamatuod, nagpangayo pa ang city government sang extension kag gin-aprubahan man nga tubtub pa sa Agusto 26 ang tagtaganay sang cash aid sa mga residente.
Sa interview sang Bombo Radyo kay Iloilo City Mayor Jerry Treñas, iya ginpahayag nga indi pwede matingob sa isa lang ka lugar ang mga residente ilabi na bangud naka-enhanced community quarantine pa ang syudad.
Kumpleto man suno sa iya ang mga staff sang City Social Welfare and Development Office (CSWDO) agud matungdan ang ila responsibilidad sa cash aid distribution.
Una naman nga nagdepensa man ang Iloilo City Accountant’s Office nga wala man sila sang kapaltahan bangud maid-id man sila sa pag-check sang masterlist kay payroll kag nagabalik man sila pati sa weekend para sa ila nga trabaho. ###
