Natumod na sang mga pulis ang suspek sa pagbuno-patay sa Southeast Asian Games gold medalist kag long-time member sang national team nga si Mervin Guarte sa Calapan City, Oriental Mindoro.
Suno kay Calapan City police chief Lt. Col. Roden Fulache, gina-asikaso na nila ang ipasaka nga criminal complaint nga murder batok sa sa 31-anyos nga tricycle driver nga amo ang ginasuspetsahan nga nagbuno kay Guarte sa dughan samtang nagakatulog ini.
Nakapangayo pa sang bulig ang atleta kag nadala pa ini sa pinakamalapit nga ospital apang napatay gid sa edad nga 32-anyos bangud sa daku nga pilas.
May nakuha nga CCTV footage kun sa diin nakit-an nga nagsulod ang suspek sa balay kun sa diin nagtulog si Guarte. Tres minutos ang nakaligad, nagguwa ini nga daw wala lang sang natabo, apang sang yara na ini sa unhan, nagdalagan ini.
Ginapatihan nga may dumot ang suspek kay Guarte. May nagaguwa man nga inisyal nga impormasyon nga childhood friend man niya ini. Indi na ini subong makit-an sa Calapan City apang padayon nga ginapangita sang mga pulis mangin sa kaiping nga mga banwa.
Nagpanawagan naman si Philippine Olympic Committee (POC) president Abraham “Bambol” Tolentino sa mga pulis nga dasigon pa gid ang imbestigasyon agud mahatagan sang hustisya ang kamatayon sang atleta.
Nahibaluan nga assigned si Guarte sa Fernando Air Base sa Lipa City, Batangas bilang isa man ka Airman First Class sang Philippine Air Force.
Sampaw-sampaw nga SEA Games medals ang nadag-an sini bilang kabahin sang track and field kag obstacle course racing national teams kaupod kanday EJ Obiena.
Lakip sa yara sa iya nga koleksyon amo ang gold medals sa men’s 5km event sa 2019 Southeast Asian Games kag men’s team relay sa 2023 regional biennial sporting meet. May duha man siya ka silver medals sa 2011 SEA Games sa men’s 800-meter kag 1500-meter events sa track and field.
