Nagpositibo ang isa ka tricycle driver sa iligal nga druga kasunod sang ginpatigayon nga random drug testing sang Land Transportation Office Region 6 (LTO-6) kag Philippine Drug Enforcement Agency (PDEA) Region 6 sa duha ka transport terminal sa Iloilo City.
Sa interview sang Bombo Radyo kay Atty. Gaudioso Geduspan II, Director sang Land Transportation Office Region 6, iya ginpahayag nga ang simultaneous drug testing ginpatigayon sa Tagbak Terminal kon sa diin, may yara sang 112 ka mga driver ang ginpaidalom sa drug test.
Sa amo nga terminal man nagabyahe ang amo nga tricycle driver.
Samtang, 102 drivers naman ang ginpaidalom sa amo nga tikang sa bahin sang Ungka Terminal.
Suno kay Geduspan, kasunod sang pagpositibo sang tricycle driver, ipaidalom pa ini sa gihapon sa confirmatory test apang, hawidan sa gihapon sang LTO ang iya nga lisensya.
Pananglitan nga makumpirma sa confirmatory test nga involve sa illegal drugs ang driver, i-revoke sang talatapan ang drivers’ license sini.
Gin-athag man sang natungdan nga ang drug test ang nagatuyo nga ipabilin nga safe kag malayo sa mga kompromisa ang mga pasahero.
